2013 A-Khioh（阿却）賞台語文學作品集

《2013 A-Khioh（阿却）賞台語文學作品集》

作者： 邱偉欣, 林貴龍, 陳廷宣
出版社：台語傳播企業有限公司
優惠價：79折276元
內容簡介
       李江却台語文教基金會為著鼓勵閣較濟人進行台語創作佮研究，設立阿却賞。《2013 A-Khioh賞－台語文學作品集》選對2012年來，得獎ê一篇長篇小說佮兩篇劇本。邱偉欣ê長篇小說《Gíng》佇頭序對台灣這个島嶼講起，台灣人ê歷史記錄著被壓迫ê種種，親像路邊ê草仔予牛車「gíng」過ê性命，透過一个小庄頭「璧麗村」ê故事來敨開偌儕層層ê歷史。

　　劇本有林貴龍〈語言ê力量〉、陳廷宣（A-hi）〈Biàn-tsih內ê春天〉。〈語言ê力量〉透過口白、辯話骨將「語詞、諺語」展示出來，袂輸「行話」ê小教室，是展覽兼娛樂ê劇本。〈Biàn-tsih內ê春天〉是有關野球ê劇本，陳廷宣是台文界野球文學ê代表，掠「球是圓ê」、「第九局」來做重點，描寫心理，這齣劇本呈現有野心ê觀點，這是戲劇tsiah有法度清楚展現ê特點。

　　透過欣賞遮的作品，會當看著台語文學閣較開闊ê創作視野。

----------------------------------------------------------------------
買冊$1000以上，免運費$65
買冊請連絡：tgtpbooks@gmail.com
郵局劃撥口座：50176135 戶名:台語傳播企業有限公司
彰化銀行北新分行 5623-01-068191-00
戶名:台語傳播企業有限公司
----------------------------------------------------------------------

序言：A-Khioh ê 長篇小說
陳明仁/台灣詩人

「小說」tsit个詞，ài讀文音「siáu-suat」，古早Tsi-ná出現ê「小說」，是儒家phì-siùⁿ ê「非合統治適用ê論說」，品訂為「下流」，kap tsit時印象ê「小說」無相關。日本人明治維新了後，kā真濟近現代文化詞用漢字造詞，古早日本ê情節故事用「物語」、「補物帳」等ê詞。「文學、小說、散文」意思kap漢字原意kan-taⁿ小可仔牽連niā-niā，tsit款詞ài讀文音，散文音「sàn-bûn」。

小說tī西方真早就有神話故事，用「novel」tsit个新奇ê形容詞做名詞，日本翻做「小說」若khah無hiah長篇--ê，就稱「novelette」，短篇小說就用fiction（想--ê、編--ê、假--ê），做正式ê名。純文學創作通常lóng是編故事來舖排創作者ê「ideal」（理想），裝thāⁿ suí ê語言，用各族ê名字符號書寫。各族群讀者對作品ê回應，通常ē引起思想ê轉變，「文藝復興」就是lán知ê情境。

長篇（novel）、中篇（novelette）、短篇（fiction）有時仔m̄是真嚴格ê分類，長、短ê創作質性無完全相仝。古早時代ê世界名著lóng規部，讀tsiok久，hit-tsūn ê人無啥gī-niū，khah ē-tàng專心享受長篇小說。筆者初中ê時，工讀生bih tī圖書館，有時仔mā偷借轉（tńg）去讀，學科成績suah真bái，高中tsiah tio̍h去台北夜間部掛名修學，m̄-koh kāng款讀世界長篇小說，回想--起-來，也是幸福。

現代人時間真kiap，m̄是時間ê單位khah短，是分配hō͘趁錢iah是khah心適ê gī-niū siuⁿ濟，長篇小說就khah敗市。

李江却台語文教基金會是專業ê台語文學運動組織，tshuàn講統治者無beh做，m̄-kuh台灣人bē堪得等ê事項，kap別款基金會性質無重疊，tī統治者無重視台語各族母語ê時代，出母語雜誌、組台文讀冊會，設獎勵台語文學獎kap台文學術論文獎賞，資源有限，賞金無濟，mā tī文學界、學術界hō͘有心--ê重視，tsit幾年koh增加戲劇文學ê獎項，戲劇tī文學類也是主流之一。

2012年起，想講長篇小說若無鼓勵，台語文學koh欠一塊，增設長篇小說賞，koh真正有志士來稿。2012年選出林貴龍ê小說，2013年選邱偉欣ê小說。邱偉欣是青年創作者，伊ê思維有新ê語言kap視野，內容無beh tī tsia漏洩，hō͘讀者家己去讀。

台灣現況真危險，台語文是台灣弱勢ê堅心守護兼創造者，逐个kīng力相thīn。



「看」兩齣戲
――評2013 A-Khioh賞「劇本組」

施俊州/《台灣文藝》主編、成功大學台灣文學系博士


2013 年ê A-Khioh賞設「劇本組」，入選兩篇：林貴龍，〈語言ê力量〉；陳廷宣（A-hi），〈Biàn-tsih內ê春天〉。林貴龍，2012年A-Khioh賞長篇小說獎ê得主。A-hi，講有寫詩、出一本散文集（2005），是講伊ê小說散散仔刊，tiāⁿ-tiāⁿ hō͘ lán讀著目睭光。講透ki，in lóng是小說家ê pān。

小說家寫劇本無啥mih m̄-tio̍h，mā無啥mih m̄好。跨文類寫作天公地道，欠跤手ê台語文學界，koh-khah thang鼓舞tsit-lō「試寫」風氣。講bóng講，文類ê典型小比--一-下，tsiah知戲就是戲；劇本寫作，對lán慣勢寫「字」、編意象，慣勢kō͘「字」講故事ê小說家、詩人來講，的確是挑戰。

〈語言ê力量〉ê「下齣」，用半thang光ê紗仔做幕，是規齣khah「舞台」ê一場。戲文順順仔kā讀，就知寫作動機、目的無tī舞台，tī語言「教學」――透過口白展覽語言智識；辯話骨是tsit-lō展覽兼娛樂ê手路。語彙、諺語一句仔一句「辯」--落-來，免啥mih寫劇經驗kap學問。〈語言ê力量〉hō͘ lán想著陳明仁tī BONG報、tī海翁《台語教育報》寫ê「專業行話」欄、「心適ê台語」欄，甚至月球唱片ê脫線系列爆笑劇。

〈Biàn-tsih內ê春天〉有khah小說--一-屑-仔。逐家掩名讀tsit篇，to知A-hi寫--ê。到tsit-tsūn，台文界有leh寫野球文學--ê，就A-hi一个有代表性。A-hi ê野球文本íng-íng掠「球是圓--ê」、「第九局」做critical point，描寫心理、kí-tu̍h弊案。舞台設計、「觀點」tsiâⁿ有野心；戲kám ē演--ê，是大問題。論tsit點，〈Biàn-tsih內ê春天〉m̄是小說，是影戲；Hiah-nī有野心ê「觀點」，ài kō͘鏡頭呈現，tsiah有thang ha̍h作者ê編寫動機。

吳念真講伊評電影劇本，頭一个標準：看戲ē演bē演--ê。是講，lán mā聽過林正盛hē伊ê想法：「Ē演bē演--ê，錢摃--落就有」。技術性kap編劇本色ê問題，突顯戲劇教育kap lán ê劇場需求：Sòng-hiong ê運動脈絡，有法度獎勵優質劇本，「lán ê劇場」kám就tshiâⁿ ē起優質ê演出？Ah是講，有戲thang「讀」就好？

――2014/2/20